Bilaterale integrasie |
Die vermoë om albei kante van die liggaam saam te koördineer. Bv. Wanneer ‘n mens loop of hardloop |
Deel / geheel konsep |
Die dele van ‘n voorwerp wat, as hulle saam gebruik word, ‘n geheel vorm, bv. ‘n vliegtuig en sy vlerk wat weg is |
Emosionele bewustheid |
Die vermoë om jou gevoelens uit te spreek en te herken |
Fynmotoriese vaardighede |
Die ontwikkeling van die klein spiere van die liggaam, veral die hande, vingers, tone en tong om take soos skryf, teken, knip, lek en praat uit te voer |
Grootmotoriese vaardighede |
Die ontwikkeling van die groot spiere van die liggaam, veral die arms en bene om take soos die gooi en vang van ‘n bal akkuraat uit te voer |
Kategorisering |
Die vermoë om dinge in ‘n groep of klas te plaas |
Kognitiewe vaardighede |
Denkvaardighede wat ‘n mens help om doeltreffend te leer |
Kritiese denkvaardighede |
Die vermoë om versigtig te oordeel en vir jouself te dink |
Lae spiertonus |
‘n Subnormale tonus in die spiere wat byvoorbeeld ‘n swak postuur, swak balans sowel as ontoereikende ooghandkoördinasie veroorsaak |
Middellyn |
Dit is die denkbeeldige vertikale lyn wat die linker- en regterkant van die liggaam verdeel, asook die horisontale lyn wat die boonste en onderste deel van die liggaam verdeel |
Middellynkruising |
Die vermoë om die vertikale lyn van die liggaam met die oë, die hande of die voete te kruis, bv. om die linkerhand te gebruik om aan iets aan die regterkant van die liggaam te raak |
Oog-handkoördinasie |
Die geïntegreerde werking van die oog en die hand om take met gemak uit te voer (soos om ‘n pen vas te hou terwyl jy teken of skryf) |
Oorsaak en gevolg |
Die vermoë om die redes te verstaan waarom iets gebeur en wat die uitslag daarvan gaan wees |
Pas lettervorms |
Die vermoë om die ooreenstemmende vorms van letters by mekaar te pas as voorbereiding vir lees |
Persepsievaardighede |
Waarnemingsvaardighede; die vermoë van die brein om via die sintuie – sien, hoor, proe, ruik, voel – die buitewêreld te ervaar |
Postuur |
Die vermoë om die liggaam regop te hou terwyl jy sit, staan of stap |
Potloodbeheer |
Die vermoë om ‘n potlood of ander skryfimplement korrek vas te hou en te gebruik |
Probleemoplossingsvaardig-hede |
Die vermoë om oplossing vir porbleme en vrae te vind |
Rigting |
‘n Begrip vir waarheen ‘n voorwerp beweeg en waarvandaan dit kom |
Ruimtelike verhoudings |
Die vermoë om die posisie van twee of meer voorwerpe in verhouding tot mekaar waar te neem, bv. voor, agter, langs |
Sekwensie |
Om dinge of prente in ‘n logiese volgorde te rangskik, bv. 1, 2, 3, eerste tot laaste, van die grootste tot die kleinste |
Selfbeeld |
Die algemene idee wat ‘n mens van jouself het, wat positief of negatief kan wees |
Sortering |
Weet hoe om dinge volgens hul eienskappe te orden, bv. hoe om die ronde lekkers in een houer en die vierkantiges in ‘n ander te sit |
Visuele diskriminasie |
Die vermoë om ooreenkomste en verskille raak te sien |
Visuele motoriese koördinasie |
Die manier waarop die oë gedurende beweging met die ander dele van die liggaam koördineer en saamwerk;bv. die proses waartydens dinge soos vorms gesien word en dit met die hand nageteken en die brein ingespan word |
Voorbereidende leesvaardighede |
Vaardighede wat die jong kind vir lees voorberei voordat hy of sy werklik kan lees |
Voorgrond-agtergrond-diskriminasie |
Die vermoë om op ‘n spesifieke item te fokus en dit op die voorgrond te plaas en waar te neem terwyl ander items op die agtergrond verdwyn |
Opvoedkundige aspekte om te ontwikkel vir skoolgereedheid
September 13, 2008
afrikaans, education, mamma, onderwys, ouers, pappa, school, skool arbeidsterapie, fynmotoriese, opvoedkundig, ouditief, persepsie, perseptueel, visueel 13 Kommentaar
Juffer
© My Klaskamer - idees en gedagtes uit 'n juffrou se pen 
Nov 30, 2009 @ 10:14:13
More Juffer
Ek woon in die Noordelike Voorstede van Wes Kaap, Durbanville omgewing. Ek is opsoek na iemand waar ek my “voog” dogtertjie kan laat toets vir skoolgereedheid. Kan jy asseblief help?
Groete
LikeLike
Des 01, 2009 @ 12:05:36
Hello Odette
Dis iets wat ‘n mens maar by ‘n opvoedkundige sielkundige moet laat doen – tensy die skool (waarheen julle haar wil neem) ‘n oulike toetsing het. Dr Anthony Costandius is een van die sielkundiges by PROMED – wat dikwels praatjies in verband met skoolgereedheid lewer. Jy kan ook vir Sanet Schoeman by dieselfde praktyk probeer: Educationalist Psychologist
PROMED, 1A Hibiscus Street, Durbanville, 7551
Tel: 021 975 2230
Baie sterkte! 😉
LikeLike
Feb 08, 2011 @ 07:30:23
Juffer
My dogtertjie is 4 en sukkel vreeslik met een been spring, sy is ‘n baie versigtige kind en is bang sy val. Hoe kan ek haar speel-speel leer? Ek probeer te hard om te leer en dan wil sy nie saamwerk nie.
Dankie vir ‘n blad waar mens kan hulp soek!!
LikeLike
Feb 08, 2011 @ 17:02:51
Hello, Junika 😉 4 is nog jonk en dalk is haar balans nog nie so sterk ontwikkel nie. Dis dalk ‘n bietjie vroeg vir terapie. Balletklassies vir beginners kan dalk ‘n manier wees om haar soos ‘n prinsessie te laat trippel en huppel. ‘n Mens kan ook iets soos Hop Scotch met haar speel. Speel “follow the leader” deur op ‘n plat oppervlak te draai en te hop. Later kan jy hoepels as ‘n hindernis gebruik. Spring dan met twee voete daarin en oor en later met een voet. Hou dit spelerig en lekker. Wees ook op die uitkyk vir programme soos Monkeynastics of Playball waar kinders deur ‘n opgeleide persoon gehelp word om verskillende vaardighede te ontwikkel. Indien julle oefensessies spanning veroorsaak, sal die hulp van ‘n buite-persoon help om dit te verlig. 😉 Sterkte!
LikeLike
Feb 09, 2011 @ 14:19:48
Liewe Juffer
Baie dankie!! Jy sal nie glo nie, ek is ‘n Playball juffrou, ek dink dit waat die frustasie vandaan kom. Dit is nogals vir my moeilik om my eie kind af te rig. Ek moet ook nog by se dat sy eers Desember verjaar so sy het Des 4 geword. Ek dink dis maar die ma in my wat inskop wanneer ek sien sy kry skaam omdat sy dit nie regkry nie. Ek sal wel nou bietjie meer “relax’ as jy reken sy nog jonk. Baie dankie!!
Groete
LikeLike
Feb 09, 2011 @ 19:31:45
😆 Dit lol maar altyd as die outjie in sy ma se klas moet wees 😉 Gee kans. Die beentjies en balans sal nog ontwikkel en as dit aanhou lol kan ons weer aan ‘n plan dink 😉
LikeLike
Mei 11, 2011 @ 14:19:31
My kind is nou 5 word 6 in Junie. Hy is baie agter in gr R in vergelyking met sy maats. Hy kan nie tel nie of kleure uitken nie die lys is eindeloos. Hoe kan n arbeidsterapeut help?
LikeLike
Mei 11, 2011 @ 20:12:38
Hallo, Ek 😉
‘n Mens kan ‘n bietjie tuis oefen en self skouer aan die wiel sit, maar ‘n arbeidsterapeut sal vir jou ‘n evaluasie van die fisiese aspekte soos middellynkruising, spiertonus, balans, postuur, potloodgreep, visuele integrasie, ensovoorts kan doen en raad gee.
Het julle al die ogies laat toets vir visie / sig en die uitkenning van kleur? Dit kan dalk waardevol wees om so iets te probeer. Optometriste soos SpecSavers doen oogtoetse dikwels teen ‘n bitter goeie tarief vir kinders onder die ouderdom van 12 jaar – vra gerus.
Ek sou ‘n konsultasie met ‘n arbeidsterapeut probeer het om sekerheid te kry. Indien terapie nie vordering toon nie (gee ‘n kwartaal kans), kan ‘n mens ‘n opvoedkundige sielkundige nader om ‘n skoolgereedheidstoets te doen.
Jy het lekker vroeg al begin soek na hulp en hoe gouer ‘n mens weg spring en begin werk en woel, hoe beter is die kans om lekker te ontwikkel vir Graad 1.
Baie sterkte 😉
LikeLike
Jan 19, 2015 @ 17:43:07
Naand Juffer. My poppie is 8 en herhaal haar graad 1> Sy het ADHD Angstigheid en is impulsief. watter fyn motoriese oefening kan jy aanbeveel asb t.o.v spraak klanke skryf en wiskunde en artukulasie. Sy skryf haar woorde agterste voor om ook.
LikeLike
Jan 20, 2015 @ 01:47:48
Hallo, Ilse 😉 ‘n Mens kan ‘n verskeidenheid aktiwiteite gereeld herhaal. Jy kan soekterme soos “fynspier, handspier, skrif, skryf, potloodgreep, abc, uitspraak, klanke, b en d, VMI, ogies, visuele persepsie, oog- en fokus oefeninge, links en regs, tuis oefening…halveer, verdubbel, woordsom, syfer, patroon, vorm, wiskunde…Graad 1, hersien, sigwoord, lees, rympie, liedjie, storie, aandagafleibaar, vraestel, JNA…” by die bruin soekblokkie laer af aan die regterkant van die blog in tik om verskillende idees en skrywes te lees. Daar is heelwat skakels en werksvelle in die onderskeie skrywes, maar jy sal ook etlike gratis werkstukke op die Drukbare Bladsye kry. Aan die regterkant is verskeie skakels onder hofies soos Geletterdheid, Emosioneel, Wiskunde en Spraak – wat alles idees kan bied.
Ontvang sy arbeidsterapie vir die omkerings of is die ogies dalk getoets vir onegalige oogbewegings?
LikeLike
Jan 20, 2015 @ 05:56:17
Sy het desember met arbeids terapie begin en ons oorweeg om haar te vat vir oogtoetse.
Ilse S
LikeLike
Jul 13, 2017 @ 14:39:22
Hoe kan ek ‘n 5 jarige daarmee help om die moeiliker konsonantkombinasies soos ‘tr’ te bemeester, asseblief?
LikeLike
Jul 13, 2017 @ 14:59:31
Hallo, Noelien 😉 Die uitspraak van “r” en die verskillende kombinasies gaan ‘n bietjie later – in Graad 1 en 2 onderskeidelik – aandag geniet en bemeester word. Jy kan egter hier na prente (ens.) loer indien julle solank ‘n bietjie wil loer.
LikeLike